atmosfera

Envoltura gasosa que rodea a superficie (sólida e líquida) da Terra. A definición pode xeneralizarse a calquera corpo celeste, pero nesta entrada referirémonos só á atmosfera terrestre, chamada habitualmente atmosfera. Constitúe un dos cinco subsistemas que forman o sistema climático. O aire que a forma distribúese en capas cuxo número varía en función do criterio que se considere. Atendendo ao perfil vertical de temperatura, a atmosfera divídese en cinco capas ben definidas (troposfera, estratosfera, mesosfera, termosfera e exosfera), nas que, alternativamente, se producen ascensos e descensos térmicos. Esta é a división atmosférica que prevalece, aínda que se poden establecer outras complementarias, igualmente válidas, en función da composición química ou da estrutura electrónica. Aínda que algúns autores fixan o límite superior da atmosfera a determinada altitude, tal límite carece de sentido físico, xa que a fronteira co espazo é difusa. A densidade do aire decrece progresivamente ao ascender, sen que se poida afirmar que a partir dun nivel é igual a cero. Mentres que a efectos aeronáuticos o límite entre a atmosfera e o espazo exterior queda establecido a 100 quilómetros de altitude -a chamada liña de Kármán-, en Meteoroloxía, o máis común é situar dita fronteira 300 quilómetros por encima das nosas cabezas. A maior parte da masa da atmosfera concéntrase na súa parte baixa, onde a densidade do aire diminúe moi acusadamente coa altura. Aproximadamente a metade desa masa localízase nos primeiros cinco quilómetros de atmosfera e o 99 % nos primeiros trinta. De aí para arriba, o aire está moi enrarecido.