Ионосфер

Агаар мандлын ойролцоогоор 60-80-аас 500-1000 км-ийн өндөр хүртэл тархсан бүс бөгөөд агаар нь ионжсон тул эерэг ионууд болон чөлөөт электронууд түүгээр урсаж, цахилгаан дамжуулагч шиг ажилладаг. Ионы нягт нь тодорхой давтамжийн мужийн радио долгион түүнд ойхоор хангалттай өндөр. Мөн хиймэл дагуулаас Дэлхий рүү илгээсэн дохионд нөлөөлж, хөндлөнгийн нөлөөлөл үүсгэдэг. Дунд өргөрөгт энэ агаар мандлын бүс дэх ионжилт голдуу нарны цацрагийн тодорхой хэт ягаан ба рентген туяаны зурвасыг шингээснээс үүдэлтэй бол өндөр өргөрөгт голдуу нарны салхиар зөөгдөх, Дэлхийн соронзон орноор туйл руу хазайлгагдах өндөр энергитэй бөөмсөөс үүсдэг. Ионосфер нь D, E, F гэсэн үсгээр нэрлэгддэг гурван давхаргад хуваагддаг. D давхарга нь зөвхөн өдөр байх бөгөөд бүгдээс хамгийн доод нь, ойролцоогоор 60 км-ийн өндрөөс илэрч эхэлдэг. Түүний дээр E давхарга, бүр дээр нь өдөр эсвэл шөнө байгаагаас хамааран өөр өөр зузаантай хоёр дэд давхарга (F1 ба F2)-д хуваагддаг F давхарга оршино. Ионосферийн давхарга тус бүрийн үндсэн шинж чанаруудыг энэ толь бичгийн харгалзах нийтлэлүүдэд нарийвчлан тайлбарласан.

Холбогдох нэр томьёо: Д давхарга