dispersión de Rayleigh

Dispersión (ou difusión) atmosférica da luz ou de calquera outra radiación electromagnética que se produce tras incidir en moléculas de aire ou minúsculas partículas de simetría esférica en suspensión, con diámetros inferiores á décima parte da lonxitude de onda da radiación incidente. Esta dispersión é a responsable da cor azul do ceo. A intensidade da radiación difusa que emana da atmosfera é inversamente proporcional á cuarta potencia da lonxitude de onda, tal e como establece a lei que en 1871 propuxo o físico e aristócrata británico John William Strutt (1842-1919), máis coñecido como Lord Rayleigh. Se o ceo raso o vemos azul en lugar de vermello ou doutras cores do espectro visible, é porque, de acordo coa citada lei, dispérsanse con maior intensidade as cores de menores lonxitudes de onda (azul e violeta) que as de maiores (vermello e laranxa).