termosfera

Capa da atmosfera situada entre a mesosfera e a exosfera. A cuarta contando desde abaixo das cinco en que se divide a atmosfera, se atendemos á súa estrutura térmica vertical. Esténdese desde os 80 ata uns 500-600 km de altitude, aínda que o seu espesor é variable, sendo ás veces maior (termopausa). Nesta capa, a densidade do aire é moi baixa e está fortemente ionizado, debido á acción da radiación ultravioleta, os raios gamma e os raios X provenientes do sol, que a atravesan case sen atenuación. O nome da capa fai alusión á calor (o prefixo «termo-» provén do grego antigo θερμός [ thermos ], que significa quente), xa que en toda ela a temperatura aumenta ao ascender, alcanzando valores moi elevados na súa parte superior, da orde dos 1000-1500 ºC. Durante o día, ao ser atravesada pola radiación solar, o gas enrarecido que a compón pode alcanzar picos de temperatura bastante maiores, de ata 2500 ºC, aínda que calquera obxecto situado alí arriba -como ocorre, por exemplo, coa Estación Espacial Internacional- non se quenta por contacto, xa que a densidade molecular é tan baixa que non hai condución de calor.