Meteoroloxía

Ciencia que se encarga de estudar os meteoros, orientada principalmente á predición do tempo. Abarca desde o estudo físico, químico e dinámico dos diferentes fenómenos atmosféricos, ata a observación minuciosa de todo o que acontece na atmosfera, o estudo das interaccións do medio atmosférico cos demais compoñentes do sistema climático e o desenvolvemento de modelos conceptuais e matemáticos, destinados estes últimos a anticipar a súa evolución futura. A liña de separación entre a Meteoroloxía e a Climatoloxía é difusa, solapándose parcialmente os cometidos abordados por ambas as dúas disciplinas científicas. A orixe etimolóxica do termo remóntase á Antiga Grecia, onde empezou a empregarse o vocábulo ( meteoros), que forma a raíz da palabra, aínda que cun sentido máis amplo que o actual, xa que describía calquera fenómeno celeste, fose ou non de natureza atmosférica. Aínda que a palabra «Meteoroloxía» se atribúe a Aristóteles (384-322 a. C.), derivada do título do seu coñecido tratado Meteorologica (Os meteorolóxicos), foi empregada con anterioridade por Dióxenes de Apolonia (450-399 a. C.). Os catro libros que forman o tratado aristotélico -escritos cara ao ano 340 a. C.- contribuíron a integrar o estudo dos meteoros dentro da filosofía natural, converténdose no libro de referencia sobre o tema durante dous milenios, ata ben entrado o século xvii . É moi común expresar «Metereoloxía» en lugar de Meteoroloxía. O erro esténdese a outras palabras da mesma familia, como meteorólogo («metereólogo») e meteorolóxico («metereolóxico»).