euri-tanta

Hodei baten barnean sortu eta hazten den eta bertatik prezipitatzen den ur-tanta da, 0,5 eta 6 mm arteko diametroa duena (baldintza egoki oso berezietan 10 mm-ra [=1 cm] hedatu daitekeena). Balio txikienak marratzen du zirimiri-tanta baten eta euri-tanta baten arteko muga. Balio handienari dagokionez, luzaroan pentsatu izan da diametro horretatik gorako euri-tantarik ezin izan zitekeela egon, 6 mm horiek euren hazkuntzaren muga teoretikotzat jotzen baitziren, hala non balio handiagoetarako, tantak nahitaez bi tanta txikiagotan edo gehiagotan zatitu behar zuen, uraren gainazal-tentsioaren eta barne-presioaren arteko oreka hautsi ondoren. 2004an, Washingtongo Unibertsitateko (AEB) ikertzaile batzuek, hegazkin batean instalatutako laser-teknologian oinarritutako tresna batekin, 8,8 mm-ko diametroa zuten bi tanta neurtu zituzten eremu tropikaleko bi leku desberdinetan. Aurkikuntza horrek euri-tanta erraldoiak existitzea iradokitzen du, zentimetro bateko diametroraino, ur likidoaren edukia oso altua den hodeien barnean. Tamaina txikiagoko tanten arteko talka anitzen emaitza dira.