osíxeno
Segundo compoñente máis abundante da mestura gasosa que forma a atmosfera. Ocupa un 20,95 % do seu volume, estando presente no aire maioritariamente na súa forma diatómica (O2 ). As moléculas de osíxeno disócianse preferentemente na alta atmosfera, dando lugar a átomos libres do citado elemento. Ao igual que o nitróxeno, é un gas incoloro, inodoro e insípido, fundamental para a vida, que os seres vivos consomen a través da respiración. A actividade fotosintética das plantas e outros organismos como as cianobacterias e o fitoplancto mariño é o mecanismo encargado de repoñelo, incorporándoo ao aire.