exosfera

Capa exterior da atmosfera, sen uns límites ben definidos. A maioría dos autores sitúana entre os 500 e os 10000 quilómetros de altitude, pero non hai un acordo unánime. A recente análise duns datos tomados na década de 1990 polo SOHO (Observatorio Solar e Heliosférico) revelou a presenza de átomos de hidróxeno neutro de natureza atmosférica a 630000 quilómetros de distancia da superficie terrestre. Na exosfera a densidade do aire é moi pequena -desprezable a efectos prácticos-, sen que apenas se produzan choques entre as moléculas gasosas dese aire tan enrarecido, escapando algunhas delas -as máis lixeiras- do campo gravitatorio terrestre. En Meteoroloxía, é común considerar o tope da atmosfera a 300 quilómetros de altitude, de xeito que o que queda por riba se considera o baleiro. Pola súa banda, a Federación Aeronáutica Internacional fixa a tan só 100 km o límite entre a atmosfera e o espazo, o que se coñece como a liña de Kármán.