gloria

Fenomeno optiko atmosferiko bat da, eraztun distiratsuz osatutako serie bat edo gehiago, behatzaile batek bere itzalaren inguruan ikus dezakeena, itzal hori uraren tantatxoz soilik osatutako hodei baten gainean proiektatzen denean. Noizbehinka, elurraren eta ihintzaren gainean ere ikus daiteke. Tantatxoetan eragiten duen argi intzidentearen atzeranzko sakabanaketaren emaitza da, non aipatutako argiaren gorapena, errefrakzioa eta difrakzioa konbinatzen diren. Gloriaren diametro angeluarra -ostadarrarena baino askoz txikiagoa- tantatxoenaren alderantziz proportzionala da. Tantatxo horien tamainen uniformetasun handiagoak edo txikiagoak zehazten du eraztun-serie bakarra ala hainbat ikusiko ditugun. Itzala sortzen duen objektuaren ertzen inguruan argia difraktatzean gertatzen diren interferentzia-fenomenoak dira banatutako banda distiratsuak agertzearen erantzule. Gloria bat ikus dezakegun egoeretako bat hegazkinez bidaiatzean da, hodei-itsaso baten gainetik hegan egiten duenean. Aireontziak bere itzala hodei-geruza horren gainean proiektatzen badu, aukera handiak izango ditugu haren inguruan gloria ikusteko. Fenomenoa Ulloaren eraztun, zirkulu, koroa edo halo izenez ere ezagutzen da, Antonio de Ulloa (1716-1795) itsasgizon espainiarraren omenez, harena izan baitzen fenomenoaren lehen deskribapen zientifikoa egin zuena. Eguzki-aurkako puntuan zentratuta dagoenez, anthelio edo anthelion izenaz ere ezagutzen da.