levante

Ekialdeko haizeari ematen zaion izen generikoa da, Espainiako Mediterraneo osoko kostaldean erabilia. Terminoak eguzkia altxatzen (ateratzen) den lekutik jotzen duen haizeari egiten dio erreferentzia. Ibilbide itsastarra duenez, haize freskoa eta oso hezea da, kostaldeko mendikateetan hodeiak eratzen laguntzen duena eta oso euri eraginkorrak sortzen dituena, betiere egoera meteorologikoa horretarako egokia denean. Gibraltarko itsasartean eta inguruko eremuetan, haize hori kanalizatu eta azeleratu egiten da, bere nortasun propioa hartuz. Han, levante haizearen maiztasunak eta intentsitateak elementu meteorologiko oso nabarmen bihurtzen dute. Urteko edozein garaitan jo dezakeen arren, udaberritik udazkenera arte da maizagoa, Azoreetako antizikloiak ohiko lekua hartzen duenean laguntzen duelarik, penintsula iberiarraren zati handi bat besarkatuz. Ekialderago dauden eremuetan, udazkenean ere agertzen da, Mediterraneoko ekaitz bortitzekin lotuta. Itsasartean, levante haizeak 50 egun jarraian jo dezake eta 100 km/h-tik gorako haize-boladak izan ditzake Punta Europan (Gibraltar) eta Tarifan, non levante jotzen duen aldien ia % 60an bortitza edo oso bortitza den. Batez beste, urtean 165 egunetan jotzen du; datu hori ia zehazki bat dator poniente haizeak jotzen duen egun-kopuruarekin, azken haize hori (mendebaldekoa) ez baita hain bortitza izan ohi.