vento

Movemento do aire nun plano horizontal con respecto á superficie terrestre. Vén caracterizado por dous elementos que se miden con instrumentos, o que lles confire a condición de variables meteorolóxicas: a velocidade (ou intensidade) e a dirección (ou rumbo). Nos observatorios meteorolóxicos efectúanse medidas do vento a 10 metros por encima do chan, que constitúen os datos do vento en superficie. O vento observado (vento real) é o resultado da acción das distintas forzas que actúan en todo momento sobre o aire. En Meteoroloxía, establécense, á parte, algúns ventos teóricos -simplificacións do real- que se usan para abordar a complexa dinámica atmosférica. A nivel coloquial, é común considerar o vento como sinónimo de aire («Que aire que fai!»).