Klimatologia

Klimen azterketan aritzen den Geografia Fisikoaren adarra, bai maila deskribatzailean, bai epe luzeko aldaketei eta horiek zehazten dituzten kausa ezberdinei dagokienez. Bere eginkizunen artean daude datu meteorologikoen bilketa eta tratamendu estatistikoa, horrek klima ezberdinak definitzea eta ezaugarritzea, eta irizpide jakin batzuen arabera sailkatzea ahalbidetzen baitu. Ohikoa da Klimatologia Meteorologiarekin nahastea, nahiz eta bi zientzia ezberdin diren, helburu desberdinak dituztenak. Oso ohikoa da «klimatologia txarra» adierazpena erabiltzea eguraldi meteorologiko txarrari erreferentzia egiteko, baita «baldintza klimatologikoak» aipatzea ere baldintza meteorologikoen ordez, horrek agerian uzten duelarik pertsona askok eguraldi eta klima kontzeptuei (Meteorologia eta Klimatologia) ematen dieten erabilera okerra. Klima-aldaketaren azterketak jakintza-adar hau bultzatu du, gaur egun munduan zehar milaka zientzialari aritzen diren diziplina zientifiko berri bihurtuz. Toki bati dagokion klimatologia hitza, halaber, bere klima ezaugarritzen duen datu estatistiko multzoa identifikatzeko ere erabiltzen da.