Estación Meteorolóxica Automática (EMA)

Formadas por distintos módulos e dotadas de diferentes sensores, estas estacións teñen a capacidade de tomar datos meteorolóxicos, elaborar gráficas con eles, almacenalos e transmitilos automaticamente, a través do Sistema Mundial de Telecomunicacións da OMM, sen necesidade de que haxa persoas encargadas de levar a cabo todas esas tarefas. A intervención humana só se require nos labores de reparación e mantemento, así como para o volcado de datos, no caso de que a EMA non poida transmitilos. As redes de EMA complementan as das estacións terrestres convencionais e úsanse tanto con fins climatolóxicos como para labores de vixilancia meteorolóxica.