clima tropical

Tipo de clima característico do ámbito tropical, cuxos principais sinais de identidade son a presenza de calor húmido todo o ano, a ausencia de xeadas e un réxime pluviométrico de marcado carácter torrencial, cunha estación de choivas e outra seca. Na clasificación climática de Köppen correspóndese co tipo A. Nos lugares onde se dá este clima, todos os meses do ano, sen excepción, a temperatura media é superior aos 20 ºC (algúns autores rebaixan ese limiar ata os 18 ºC). A citada clasificación establece os seguintes tres subtipos: o clima tropical húmido ou ecuatorial (Af), o tropical monzónico (Am) e o tropical seco ou de sabana (Aw ou As, en función de que o inverno ou o verán sexa seco).