códigos Q

Conxunto de códigos creados a principios do século xx polo goberno británico para facilitar as comunicacións entre os seus barcos de guerra e as estacións costeiras. Este sistema foi desenvolvido inicialmente para a radiotelegrafía, pero foise estendendo a diferentes campos, entre eles as comunicacións por radio en aviación. Cada un dos códigos Q consta de tres letras. A primeira delas é o identificador e en todos os códigos é a Q. Os asignados á aviación son os incluídos no rango QAA-QNZ, e dentro deles atopamos varios que proporcionan ao piloto distintas referencias de presión atmosférica.