Cirrus (Ci)

A nube alta por excelencia. Xénero nuboso de aspecto desfiado e fácil identificación, constituído por un conxunto de unidades nubosas separadas, de cor branca reluciente e con forma de delicados filamentos, bancos ou franxas estreitas. A palabra cirrus é un termo latino que significa febras de cabelo ou cabeleira, o que define moi ben o seu aspecto. Os cirros percorren os ceos entre os 8 e os 12 quilómetros de altitude e están constituídos na súa totalidade por cristais de xeo, que reflicten a maior parte da radiación solar que incide sobre eles, de aí a súa brancura resplandecente. Segundo o Atlas Internacional de Nubes da OMM, este xénero nuboso pode presentar ata cinco especies distintas (fibratus , uncinus , spissatus , castellanus e floccus) e catro variedades (intortus , radiatus , vertebratus e duplicatus).