incus (inc)

Vocábulo latino que significa bigornia e que no Atlas Internacional de Nubes da OMM designa un trazo suplementario asociado ao Cumulonimbus . O citado trazo é facilmente identificable. Describe a típica forma de bigornia que adopta a parte alta dun cumulonimbo, cos seus contornos lisos, fibrosos ou estriados, abríndose en abano -neste último caso- un sinfín de filamentos nubosos de aspecto desfiañado. Este elemento tan característico é consecuencia da chegada do cume da nube de tormenta á tropopausa. A presenza desa tapadeira natural (inversión térmica) obriga a esa parte superior a estenderse na horizontal, o que perfila a estrutura longa e achatada que caracteriza a bigornia. A miúdo, é asimétrico, estendéndose máis cara a un lado que cara a outro, o que permite deducir de onde está soprando o vento dominante en altura, no nivel atmosférico máis alto acadado pola tormenta, o que adoita coincidir co seu desprazamento en terra.