canícula

Época do ano na que habitualmente fai máis calor. Aínda que non hai unhas datas fixas no calendario que marquen o seu inicio e finalización, a canícula adoita identificarse co período que vai entre o 15 de xullo e o 15 de agosto («De Virxe a Virxe, o sol aperta de firme»). A palabra ten a súa orixe etimolóxica na voz latina canis , que significa «can». A saída da estrela Sirio polo horizonte marcaba o inicio das inundacións do Nilo no Antigo Exipto, o que coincidía coa chegada do verán. Sirio é a estrela máis brillante da constelación do Canis Maior (O Can Maior), de aí o curioso nome que recibe a época máis calorosa do ano.