barómetro

Instrumento meteorolóxico empregado para medir a presión atmosférica. Hainos de varios tipos. O máis clásico de todos é o de mercurio ou de Torricelli, chamado así en honra ao seu inventor, Evangelista Torricelli (1608-1647). O máis popular é o de tipo aneroide, que é o típico barómetro ornamental que moitas persoas teñen no salón da súa casa. A invención do barómetro, en 1643, supuxo un punto de inflexión na historia da Meteoroloxía, xa que a partir dese momento se empezaron a asentar as súas bases como disciplina científica de pleno dereito.