tempestade

Palabra que deriva do vocábulo latino tempestas , que toma o significado de tormenta, borrasca, mal tempo... Algúns dicionarios defínena como tormenta grande, pero empregan «tormenta» na súa forma máis xenérica, tendo cabida nela distintos fenómenos meteorolóxicos de diferentes escalas. Un dos usos máis comúns do termo alude ao temporal marítimo particularmente violento e de gran magnitude, caracterizado por ventos moi intensos e grande ondada. Tamén é habitual identificala co conxunto de inclemencias meteorolóxicas asociadas a unha situación de tempo adverso que, normalmente, afecta a unha zona ampla de territorio, como ocorre ao paso dunha borrasca profunda, ou en determinadas contornas tormentosas.