capa límite planetaria (CLP)

Capa de aire en contacto coa superficie terrestre, sometida á súa influencia e situada por debaixo da atmosfera libre. Os movementos no seu seo están fortemente influenciados polo rozamento con dita superficie. O seu espesor é variable, oscilando entre os 500 e os 1000 metros, aínda que algúns autores sitúan a súa cota superior en 1500 m de altitude. A súa parte máis baixa é un estrato turbulento, mentres que por riba se sitúa a capa de Ekman ou de fricción, onde a influencia do rozamento diminúe rapidamente coa altura. A capa límite planetaria (CLP) recibe distintas denominacións, tales como capa de mestura, capa convectiva, capa mecánica ou capa límite atmosférica. É habitual referirse a ela polo acrónimo indicado no texto, ou os seus equivalentes en inglés (PBL [ Planetary Boundary Layer ], ABL [ Atmospheric Boundary Layer ], CBL [ Convective Boundary Layer ], ML [ Mixed Layer ]...).