vendaval

Palabra que no seu sentido máis amplo se refire a un vento moi intenso e de carácter violento, como o que xeran algunhas tormentas. O termo ten a súa orixe na expresión francesa vent d'aval (vento de abaixo), coa que na rexión francesa de Bretaña se refiren aos ventos intensos que sopran do sur e do oeste, de procedencia marítima. A expresión -reconvertida nesta palabra- empezou a usarse tanto en España como en Portugal co sentido xenérico apuntado. Nas zonas costeiras identifícase cun vento duro, que non chega a alcanzar a categoría de temporal na escala Beaufort, cuxa forza podemos situar entre 7 e 8 na citada escala. No extremo sur da península ibérica, particularmente no Baixo Guadalquivir e a zona de influencia do estreito de Xibraltar, o vendaval ten identidade propia. É o vento moi forte, húmido e con refachos do suroeste que sopra preferentemente en inverno, asociado ás borrascas que discorren polas inmediacións do golfo de Cádiz. Vén acompañado de choivas intensas, tormentas e violentas treboadas.