climograma

Gráfica onde se representan os valores medios mensuais da temperatura e da precipitación, correspondentes a un observatorio ou estación meteorolóxica. Aparte do eixe de abscisas -o horizontal-, onde aparecen os meses do ano, inclúe dous eixes de ordenadas: o da esquerda coa escala de temperatura, e o da dereita coa de precipitación. O climograma amosa, de forma simultánea, a curva do comportamento anual da temperatura e o histograma da precipitación media mensual. Recibe tamén outros nomes equivalentes, como climagrama, climatograma, ombrograma, diagrama ombrotérmico ou diagrama climático.