turbulencia en aire claro

Turbulencia atmosférica que xorde en zonas libres de nubes e fóra da área de influencia da superficie terrestre, responsable do zarandeo ao que se ven sometidos os avións comerciais durante distintos momentos da súa fase de cruceiro. Está causada principalmente pola cizalladura do vento, tanto horizontal como vertical, de aí que se detecte habitualmente nas proximidades das correntes en chorro, situadas na alta troposfera e a baixa estratosfera. No argot meteorolóxico aeronáutico, identifícase coa sigla CAT e o seu equivalente en español TAC. Nos distintos mapas de predición de uso especificamente aeronáutico, os pilotos poden consultar cales son as zonas de CAT previstas durante o voo, aínda que hai lugares onde esta turbulencia (indetectable polos sistemas de observación que levan os avións) pode xurdir de forma imprevista.