muturreko tenperaturak

Denbora-tarte jakin batean erregistratutako balioetatik altuena eta baxuena diren tenperatura-balio bikotea. Egunero lortzen diren gehieneko eta gutxieneko tenperaturek eguneroko muturrak osatzen dituzte, eta horrela geratzen dira erregistratuta behatoki meteorologikoen koadernoetan. Normalean, gehienekoa eguerdi solarra igaro eta pixka bat geroago lortzen da, gutxienekoa berriz egunsentia igaro eta pixka batera erregistratu ohi da. Egun-gau zikloak leku bateko eguneroko portaera termikoaren joera markatzen badu ere, noizbehinka muturreko balioak ohikoak ez diren egun-orduetan lor daitezke. Egoera hori, batzuetan, aire-masa oso hotzak edo oso beroak bat-batean sartzen direnean gertatzen da, eta horrek eguzki-faktoreak markatzen dituen jokabideak hondatzen ditu.