issiqlik oʻtkazuvchanlik

Tabiatda issiqlik uzatilishining usullaridan biri. U turli haroratlarda boʻlgan ikki jism yoki bir xil materialning ikki qismi oʻrtasidagi bevosita kontakt orqali yuz beradi. Issiqlik energiyasining bunday uzatilishi molekulyar harakat tufayli amalga oshadi. Havoning issiqlik oʻtkazuvchanligi past boʻlgani sababli, Yer yuzasi oʻtkazuvchanlik orqali uning ustida turgan atmosferaning faqat juda yupqa - atigi 5 santimetr qalinlikdagi - qatlamini isita oladi. Havoning bevosita yer sathida bunday isishi uning koʻtarilishiga yordam beradi (zichligining kamayishi natijasida), bunda issiqlik konveksiya orqali pastdan yuqoriga uzatiladi.