borreguiño

Ás pequenas nubes brancas e redondeadas, de aspecto similar ao algodón, adóitaselles chamar borregos, pois a súa presenza no ceo lémbranos un rabaño deles. O seu diminutivo é a forma máis estendida. É o nome que en meteoroloxía popular reciben os elementos ou unidades que forman os altocúmulos da especie floccus . A súa aparición anticipa, a miúdo, un cambio de tempo, xa que non poucas veces anteceden a chegada dun sistema frontal que deixa chuvias ao seu paso («Borreguiños no ceo, pozas no chan»). Non hai que confundir os borreguiños (no ceo) cos borregallos (na superficie do mar), aínda que ás veces se intercambian os nomes.